تصنيف الالوان ومسمياتها فى الكنارى بالصور ... (الجزء الثانى)

بسم الله الرحمن الرحيم 

          تصنيف الالوان ومسمياتها فى الكنارى بالصور ... (الجزء الثانى)

تحية طيبة لكل اخوانى الاعزاء فى المنتدى وكما وعدتكم بأكمال الجزء الثانى من الوان

الكنارى بالمسميات الصحيحة بعيدا عن المسميات الشائعة او الغير صحيحة .

مثل( الجزرى – المشمشى – السمنى – الفسدتقى – العسلى – السكرى – الكاكاوى

- الليمونى – الحبشى - الزيتونى ..الى غيرها من المسميات الشائعة )

وكما تعودنا تبسيط الموضوعات نقوم بتغيير اللغة للعامية عشان نفهم كلنا وانا اولكم

بالطبع .... هههههههه ...


انهارده حنكلم عن نوع من الالوان اسمه الملانينات . او الكنارى الملانيك بمسمياته الصحيحة

المعترف بها دوليا فى العديد من دول العالم والتى تحمل رمز (سى – اوه – ام )

وهو الاتحاد العالمى للطيور .



وماننساش حاجتين مهمين جدا

الحاجة الاولى :- هى اللى شجعنى على كتابة الموضوع اخى وصديقى الاستاذ هيثم عباس

وكنت دايما على اتصال بيه اثناء كتابة الموضوع وتبادل الاراء والافكار .


الحاجة الثانية :- ان الموضوع بجد اخد منى وقت طويل جدا فى الترجمة و التحضير والتركيز

والتأكد من المعلومات قبل كتابتها ليكون الموضوع مفيد وسهل الفهم فى نفس الوقت وارجوا

ان ينال رضاكم بأذن الله .

بسم الله نبدا شرح صبغات والوان الكنارى الملانيك .

يعنى أيه ملانين ؟

ملانين هى صغبة اللون الغامق اللى بتلون الريش وتخليه لونه اسود او بنى او بنى محمر

فى الكنارى طبعا .

وهى دى نفس الصبغة الموجوده عند البشر ايضا ولما بتكون زياده عن انسان يبقى

اسمرانى زى اخوانا الافارقة وكل ما تقل طبعا بيكون لون البشرة فاتح .


ده طبعا تعريف بسيط عشان الناس تفهم بعيد بقى عن الكلام المجعلص وعلى فكرة الكلام

المجعلص موجود وممكن نكتبه .

لكن نسهل على اخواتنا الفهم عشان يحبوا الهواية وننشرها اكتر بطريقة علمية صحيحة .


الملانين فى الكنارى نوعين

الملانين الكلاسيكى 

الملانين الغير كلاسيكى 

(وتشمل جميع الطفرات وسوف نتحدث عنها بالشرح والتفصيل ان شاء الله)



اول حاجة الملانين الكلاسيكى 
وده بينقسم الى 3 حجات

اميلانين اسود – اميلانين بنى – فايوملانين

حلو كده طيب صبغة الايملانين الاسود دى حسب توزيعها فى ريش العصفور واذا كانت

غامقة او فاتحة حسب درجة تحللها او اكسدتها بتدينا شكل لون وكل لون فيهم ليه اسم

زى ايه ..؟؟



زى الاسود و الاجات و البنى و الايزابل 

طب هل معنى كده ان الوان الليبوكروم اللى هى الابيض السائد والمتنحى والاصفر والاحمر ملهاش دعوة بالملانين .؟؟؟

لاطبعا دى هى الاساس بمعنى انها بتكون القاعدة الاساسية للون الكنارى وفوق منها لون

صبغة الملانين مش بس كده ده كمان بيدخل معاهم طفرة اللون العاجى .


يعنى احمر ملانين وابيض ملانين واصفر ملانين وعاجى ملانين ... تمام كده ؟؟؟

وكل الالوان دى بتظهر فى ال3 انواع من ريش الكناريا ( القاتم و الشيمال والموزيك )

بالمناسبة كمان نشرح بالمرة انواع ريش الكنارى لنوضح الموضوع اكتر واكتر

ريش الكنارى ينقسم الى ثلاث انواع :-


القاتم او الكثيف
Intensive

وده اتسمى بالقاتم لان الريش بيكون فيه اللون موحد من بداية الريشة حتى نهايتها واللون

بيكون بكثافة فى نهاية الريش .

وعلى فكرة الريش او اللون القاتم فى الاصل هى طفرة طرأت على الريش الشيمال اكسبت

ريش الكنارى صلابة وطول عن الريش الشيمال الاصلى .






الغير قاتم الشيمال
Non-Intensive \Schimmel \Frost

هو ريش الكنارى الاصلى وده اللون فيه بيبقى فى اول الريش واخر الريش بيبقى ابيض

وعادتا بيبقى ملمسه ناعم واقصر فى الطول من الريش القاتم وبيضاوى بعض الشئ .






الريش الفسيفساء او الموزيك
Mosaic

وده بيبقى ريش اطول من الريش الشيمال واعرض واللون فيه بتركز بقوة فى وسط الريشة

وحوالين الريشة بيبقى اللون ابيض يعنى زى ما تكون بقعة فى نص ريشة بيضاء









نكمل بقى الملانين الكلاسيكى :- 

الاسود
black


وده بيبقى صبغة اللون الاسود واكستدتها كثيفة جدا وقوية لدرجة أنها بتخلى المنقار وارجل

الطائر واظافره لونها اسود .



مش بس كده بيبان على ظهر العصفور وجنحاته علامات اللون الاسود طويلة وعريضة وطبعا

فوق اللون القاعدى الليبوكروم زى ما اتفقنا ابيض او احمر او اصفر او عاجى .





الوان الملانين الاسود 

لما يكون اللون القاعدى للاميلانين الاسود ( أبيض )

اسود ابيض سائد
Black White Dominant




اسود ابيض متنحى
Black White Recessive





لما يكون اللون القاعدى للاميلانين الاسود ( أصفر )


أسود أصفر قاتم
Black Yellow Intensive




أسود أصفر غير قاتم
Black Yellow Non-Intensive




أسود أصفر عاجى قاتم

Yellow Ivory Black Intensive





اسود اصفر عاجى غير قاتم

Yellow Ivory Black Non-Intensive





لما يكون اللون القاعدى للاميلانين الاسود (أحمر)

أسود أحمر قاتم

Black Red Intensive




أسود احمر غير قاتم
Black Red Non-Intensive 






لما يكون اللون القاعدى للاميلانين الاسود أصفر (فى ريش الموزيك)


فسيفساء اصفر أسود ( ذكر)

Yellow Black Mosaic -Male




فسيفساء أصفر أسود ( أنثى)

Yellow Black Mosaic - Female









لما يكون اللون القاعدى للاميلانين الاسود أحمر (فى ريش الموزيك)

فسيفساء أحمر أسود ( ذكر)

Black Red Mosaic -Male





فسيفساء أحمر أسود ( أنثى)

Black Red Mosaic -Female





ودى كانت بعض الامثلة لصبغة الاميلانين الاسود وان شاء الله فى الجزء الثالث نكمل

باقى صبغات الاميلانين و هكذا....حتى ننتهى من شرح جميع الالوان والطفرات .

ارجوا من الله ان يكون الموضوع نال اعجابكم ان شاء الله ويكون سهل الفهم وبسيط